بلخ کې ترافیکي پېښې؛ دوه کسان مړه او دوه نور ټپیان شوي

مزارشریف (پژواک، د وږي لومړۍ نېټه ۱۴۰۳): د بلخ امنیه قومانداني وایي چې د دغه ولایت د مرکز مزارشریف ښار مربوطاتو کې په دوو جلا ترافیکي پېښو کې دوه کسان مړه او دوه نور ټپیان شوي دي.

د بلخ امنیې قوماندانۍ د ترافیکو مدیریت له خوا خپرو شوو خبرپاڼو کې راغلي چې د دغه ولایت د مرکز مزارشریف ښار شپږمې امنیتي حوزې اړوند فردوسي سیمه کې یو موټر د تېز تګ له امله چپه شوی دی.

خبرپاڼه زیاتوي چې په دې پېښه کې یو ۱۹ کلن ځوان مړ او د چلوونکي په ګډون دوه نور کسان ټپیان شوي دي.

د یو بل خبر له مخې، د مزارشریف ښار د لسمې امنیتي حوزې قل‌محمد کلا سیمې ته نږدې یو ۴۵ کلن سړی موټر وهلی او ژوند یې له لاسه ورکړی دی.

د خبرپاڼې د معلوماتو له مخې، د یادې پېښې په تړاو د بریالي په نوم موټرچلوونکی نیول شوی او په توقیف‌ کې دی.