کابل (پژواک، ۲ وږی ۱۴۰۳): د ریاستالوزراء سیاسي مرستیال وایي، هيڅوک باید د سوداګرو پر وړاندې ستونزې جوړې نه کړي، بلکې کوښښ دې وشي چې د سیمې هېوادونو ترمنځ په اقتصادي او سوداګریزه برخه کې لا اسانتیاوې رامنځته شي.
له ارګه په خپره شوې خبرپاڼه کې راغلي چې د ریاستالوزراء سیاسي مرستیال مولوي عبدالکبیر دغه څرګندونې په خپل کاري دفتر کې د افغانستان د تازه مېوو او سبزيو له یو شمېر سوداګرو سره په لیدنه کې وکړې.
یادو سوداګرو وویل، له هېواده بهر د مېوو او سبزیجاتو په صادراتو کې زیاتوالی راغلی او د افغانستان مېوې او سبزي اوس ډېرو هېوادونو ته صادرېږي، خصوصي سکټور پر ځان بسیا شوی او په بېلابېلو سکټورونو کې د پام وړ پرمختګونه راغلي.
هغوی دغه راز د خپلو ستونزو یادونه وکړه ویې ویل، په تورخم کې د رامنځته کېدونکو ستونزو له امله سوداګر او افغان بزګران زیانمنېږي.
دغه راز، د ریاستالوزراء سیاسي مرستیال په دې لیدنه کې ویلي، د سوداګرو پر ستونزو به غور وکړي او اساسي حللارې به ورته پیدا کړي.
مولوي عبدالکبیر زیاته کړه، هيڅوک باید د سوداګرو پر وړاندې ستونزې جوړې نه کړي، بلکې کوښښ دې وشي چې د سیمې هېوادونو ترمنځ په اقتصادي او سوداګریزه برخه کې سهولتونه برابر شي.
د هغه په خبره، اړوند ادارې کوښښ کوي چې په تورخم کې د افغان سوداګرو پر وړاندې شته ستونزې هوارې کړي.
دا په داسې حال کې ده چې پاکستان په دې وروستیو کې د افغانستان پر تازه مېوو او سبزیو مالیه لوړه کړې ده.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن