کابل (پژواک، ۲ وږی ۱۴۰۳): راپورونه کاږي چې د هند لومړی وزیر نریندرا مودي نن د اوکراین پلازمېنې کیېف ته رسېدلی دی.
د امریکا غږ د راپور له مخې، د هند لومړی وزیر ښايي په دغه سفر کې د اوکراین له ولسمشر ولادمیر زیلینسکي وغواړي چې له روسیې سره جګړه د خبرو له لارې پای ته ورسوي.
مودي په داسې حال کې د منځګړيتوب هڅه کوي چې اوکرایني ځواکونو په تېرو څو اونیو کې د روسیې د خاورې ځینې برخې نیولې دي.
مودي له خپل سفر مخکې ویلي: «هيڅ ستونزه د جګړې په ډګر کې نه حل کېږي؛ هند د داسې خبرو او ډیپلوماسۍ ملاتړ کوي چې له لارې یې سوله او ثبات ژر تر ژره بېرته ټینګ شي.»
مودي زیاته کړې، پلان لري څو له زیلینسکي سره د اوکراین د روانې شخړې د سولهییز حل په اړه خپل لیدلوری شریک کړي او همدارنګه د هند او اوکراین د ملګرتیا ټینګېدو په اړه بحث وکړي.
مودي د هند لومړنی مشر دی چې اوکراین ته ځي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن