د بامیان په «قشقه» دښته کې صنعتي پارک جوړېږي

کابل (پژواک، ۳ وږی ۱۴۰۳): د صنعت او سوداګرۍ وزارت سرپرست، بامیان ته د خپل سفر په ترڅ کې اړوند مسوولینو ته لارښوونه کړې چې د دغه ولایت په «قشقه» دښته کې د صنعتي پارک د جوړېدو موضوع تعقیب کړي.

د صنعت او سوداګرۍ وزارت په خبرپاڼه کې راغلي چې د دغه وزارت سرپرست نورالدین عزیزي بامیان ولایت ته د خپل سفر په ترڅ کې د قرغنتو او قشقه په دښتو کې د صنعتي پارکونو له ځمکو څخه هم لیدنه وکړه.

سرچينې لیکلي چې عزیزي په دغه ولایت کې د قشقه دښته د صنعتي او تولیدي فابریکو لپاره مناسب ځای وباله او په دغه ولایت کې اړوند مسوولینو ته یې لارښوونه وکړه څو په دغه دښته کې د صنعتي پارک د جوړېدو موضوع تعقیب کړي.

خبرپاڼه کې راغلي چې عزیزي دغه‌راز د یاد ولایت له والي مولوي عبدالله سرحدي او نورو مسوولینو سره په ليدنه کې د لسو څخه تر پنځوس جریبه ځمکه کې د یوه سوداګریز کمپلکس پر جوړېدو هم خبرې وکړې.

سرچینې دغه‌راز لیکلي چې عزیزي د خپل دغه سفر په ترڅ کې د لاسي صنایعو لپاره د څلورو سیمه‌ییزو بازارونو جوړوونکي هم تقدیر کړل.