کابل (پژواک، ۴ وږی ۱۴۰۳): د اطلاعاتو او فرهنګ وزارت وایي، رسنۍ باید د اسلامي امارت پالیسي مراعات کړي او نشراتو کې د اشخاصو شخصي حریم ته درناوی وکړي.
اطلاعاتو او فرهنګ وزارت نن پر خپله اېکس پاڼه لیکلي چې تېره ورځ د یاد وزارت د خپرونو چارو معينيت له لوري د ياد معينيت د وارسي کوونکي ضیاءالحق حقمل په مشرۍ د رسنيو له استازو او خبريالانو سره د همغږۍ ناسته ترسره شوه.
د اطلاعاتو او فرهنګ وزارت د خپرونو چارو معینیت وارسي کوونکي مولوي ضیاالحق حقمل د رسنیو استازي خپلو مسوولیتونو ته له متوجه کولو سربېره وویل، دغه وزارت له رسنیو سره هر ډول همکارۍ ته ژمن دی او کوښښ کوي چې رسنۍ اطلاعاتو ته د لاسرسي برخه کې له ستونزو سره مخ نه شي.
هغه زیاته کړه، رسنۍ باید د اسلامي امارت پالیسي مراعات کړي، نشراتو کې د اشخاصو شخصي حریم ته د درناوي تر څنګ ملت له پرمختګونو پر وخت خبر کړي.
د رسنیو استازو ټينګار وکړ چې اطلاعاتو ته د لاسرسي برخه کې باید د اطلاعاتو او فرهنګ وزارت له دوی سره لا زیاته همکاري وکړي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن