کابل (پژواک، ۶ وږی ۱۴۰۳): د مالیې وزارت وایي، د هېواد په څلورو ګمرکونو کې د ۱۰.۵ میلیون افغانیو په لګښت د څلورو لوړ تناژ تلو د ترمیم چارې پیل شوې.
د مالیې وزارت په خبرپاڼه کې راغلي، د ګمرکونو لوی ریاست سوداګرو ته د اسانتیاوو برابرولو او د ګمرکي طی مراحلو د لا چټکتیا په موخه د کابل، شېرخان بندر، ابو نصر فراهي او پکتیکا په ګمرکونو کې د څلورو لوړ تناژ لرونکو تلو د ترمیم چارې د ۱۰،۵ میلیون افغانیو په لګښت پیل کړې.
خبرپاڼه کې راغلي، یادې تلې د اسلامي امارت له بیا ځلي واکمنېدو مخکې په غیرمعیاري ډول نصب شوې وې چې ډېری وخت به یې تخنیکي ستونزې پیدا کولې او ګمرکي چارې یې له ځنډ سره مخ کولې چې په ترمیم سره به یې ټولي ستونزي حل شي.
د خبرپاڼې د معلوماتو له مخې، د یادو تلو د ترمیم لګښت د مالیې وزارت له پراختیایي بودجې ورکول کېږي چې په دوه نیمو میاشتو کې به یې د ترمیم چارې بشپړې شي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن