مزارشریف (پژواک، ۹ وږی ۱۴۰۳): د بلخ ولایت مرکز مزارشریف ښار کې د ۲۲ میلیونه افغانیو په لګښت د الاقصی جومات په بڼه، د الفتح په نوم جومات جوړ شو.
د مزارشریف ښاروال محمدکاظم طارق وایي، دغه جومات د بلخ ولایت مقام په هدایت، د کامایر هوایي شرکت د ۲۲ میلیونه افغانیو په لګښت د ښاروالۍ تر نظارت لاندې د مزارشریف ښار په کامګار چوک کې جوړ شو.
هغه زیاتوي چې یاد جومات د فلسطین له مسلمانانو سره د غمرازۍ او مرستې په موخه د مسجد الاقصی په بڼه جوړ شوی دی.
مزارشریف ښار کې د کامایر هوایي شرکت مسوول محمدطاهر مصدق وایي، دغه جومات د یاد شرکت له لوري د ۲۲ میلیونه افغانیو په لګښت د یو کال په موده کې جوړ شوی او په یو وخت کې د ۲۰۰ لمونځکوونکو ظرفیت لري.
دغه راز، د بلخ اطلاعاتو او فرهنګ رییس ذبیحالله نوراني وایي چې دغه جومات د خلکو اړتیا ته په کتو جوړ شوی او ځکه د مسجد الاقصی بڼه ورکړل شوې چې د یاد جومات د مسلمانانو دویمه قبله یادېږي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن