ملګري ملتونه: له اسلامي امارت سره به تعامل ته دوام ورکړو

کابل (پژواک، ۱۰ وږی ۱۴۰۳): د ملګرو ملتونو ویاند وایي چې د دغه سازمان د امنیت شورا په سپارښتنه به له اسلامي امارت سره کار او تعامل ته دوام ورکړي.

د ملګرو ملتونو ویاند سټیفان دوجاریک تېره ورځ یوې ناسته کې ویلي، له اسلامي امارته غواړي چې د ډيپلوماتیک تعامل لپاره لا ډېرې لارې پرانیزي.

هغه ویلي: «له اوسنیو چارواکو سره د اړیکې په اړه زما موخه دا ده چې موږ په افغانستان کې له ټولو سهم‌لرونکو لکه طالبانو سره به خپل تعامل ته دوام ورکړو.»

هغه وایي چې ملګري ملتونه په افغانستان کې د بې‌طرفۍ، حسن نیت، د بشري حقونو او برابرۍ لپاره د قاطع ژمنو له مخې خپل فعالیتونه پر مخ بیایي.

دوجاریک دغه‌راز ویلي چې د افغانستان بندې کړای شوې پیسې باید د دغه هېواد د خلکو لپاره مصرف شي.