امریکا: په افغانستان کې له جګړې ملاتړ نه کوو

کابل (پژواک، ۱۱ وږی ۱۴۰۳): د امریکا متحده ایالتونو د بهرنیو چارو وزارت وایي، په افغانستان کې ۴۴ کاله جګړه وه او هېواد یې نه غواړي چې دغه جګړې بیا پيل شي.

د امریکا بهرنیو چارو وزارت یوه ویاند له فاکس نیوز سره خبرو کې ویلي چې دغه هېواد په افغانستان کې له وسله‌والې جګړې ملاتړ نه کوي.

د یاد وزارت ویاند چې په راپور کې یې نوم نه دی څرګند شوی، ویلي: «افغانستان کې ۴۴ کاله جګړه وه، موږ نه غواړو دغه جګړې بېرته پيل شي او له افغانانو مو هم اورېدلي چې دوی هم نور جګړه نه غواړي.»

دا په داسې حال کې ده چې د امریکا او ناټو ځواکونو شاوخوا شل کاله په افغانستان کې جګړه وکړه او د امریکا وروستی عسکر د ۱۴۰۰ کال د زمري په نهمه له افغانستانه ووت.

اروپایي ټولنې او برېتانیا هم مخکې ویلي وو چې په افغانستان کې د وسله والو مخالفینو ملاتړ نه کوي.

د ۱۴۰۲ کال په لړم میاشت کې د ترکیې بهرنیو چارو وزیر هم ویلي وو چې په افغانستان کې نور باید هيڅ وسله‌وال مخالفت شتون ونه لري.