د اروزګان پوهنتون د کمپیوټرساینس پوهنځي محصلینو ۱۹ پروژې نندارې ته وړاندې شوې

ترینکوټ (پژواک، ۱۸ وږی ۱۴۰۳): د اروزګان پوهنتون د کمپیوټرساینس پوهنځي د لومړۍ دورې محصلانو په لومړي ځل د ټکنالوژۍ برخه کې ۱۹ طرحه شوې پروژې نندارې ته وړاندې کړې.

د اروزګان پوهنتون رییس مولوي رحمت‌الله رحماني نن په دغه پوهنتون کې د کمپیوټرساینس پوهنځي د لومړۍ دورې محصلینو له لوري په جوړ شوي یو ورځني نندارتون کې د خبرو پرمهال وویل، دغه محصلین توانېدلي په کمو امکاناتو ښې لاسته‌راوړنې ولري.

هغه زیاته کړه، دغو طرحه شوو پروژو کې د یو شمېر دولتي ریاستونو لپاره د ویب‌سايټونو جوړول، د ښاروالۍ او نورو عایداتي ادارو لپاره د انلاین سیسټم فعالول، د وینې بانک ته د وینې ورکولو اړوند د عامه پوهاوي سیسټم جوړول او یو شمېر نور سافټ‌ویرونه شامل دي.

د دغه ولایت چارواکي وايي، اروزګان به ډېر ژر د ټکنالوژۍ برخه کې پر ځان بسیا شي.

ورته مهال، محصلین او د دغه نندارتون ګډونوال وايي، خوښ دي چې دغه ولایت کې په لومړي ځل د ټکنالوژۍ اړوند نندارتون کې برخه اخلي.

د اروزګان پوهنتون د کمپیوټرساینس پوهنځي د څلورم کال یو محصل بریالی چې توانېدلی یو سافټ‌ویر جوړ کړي، وایي، که نور امکانات په واک کې ورکړل شي، کولی شي دې برخه کې لا ډېر پرمختګ وکړي.