لښکرګاه کې د سړک جوړولو درېیو پروژو چارې بشپړې شوې

لښکرګاه (پژواک، ۲۱ وږی ۱۴۰): د هلمند په مرکز لښکرګاه کې د ۳۹ میلیون افغانیو په لګښت د سړک جوړولو درېیو پروژو چارې بشپړې او ګټې اخیستنې ته وسپارل شوې.

د لښکرګاه ښاروالي د عامه اړیکو مسوول محمدطاهر ابشار پژواک خبري اژانس ته وویل، په تېرو شپږو میاشتو کې د لښکرګاه ښار په لومړۍ، پنځمه، اتمه، څلورمه او درېیمه ناحیو کې د ۳۹ میلیون افغانیو په لګښت د سړک جوړولو درېیو پروژو چارې بشپړې او ګټې اخیستنې ته وسپارل شوې.

هغه زیاته کړه: «دغه څه‌کم شپږ کیلومتره سړکونه چې ټول پنځه زره ۷۵۰ متره کېږي، لګښت یې د لښکرګاه ښاروالۍ له پراختیایي بودجې ورکړل شوی دی.»

په همدې حال کې، د هلمند د ترافیکو مدیر مولوي شېرمحمد حجازي وایي، د ښاري سړکونو پراختیا او جوړېدل د ترافیکي پېښو او ښاري ګډوډۍ مخنیوي برخه کې اړین دي.

هغه وویل: «کوم سړکونه چې په ښار کې بشپړ شوي، په دې سره به په ترافیکي پېښو کې کموالی راشی.»

ورته مهال، د لښکرګاه ښار اوسېدونکي هم د یادو پروژو پر بشپړېدو خوښ دي او زیاتوي چې حکومت باید د ښاري پراختیا برخه کې دغه ډول نورې پروژې هم پلې کړي.