جلالاباد (پژواک، ۲۴ وږی ۱۴۰۳): د ننګرهار ولايت د کرنې او مالدارۍ ریاست تر چتر لاندې د يو سوداګر په ۳۰ ميليون افغانۍ پانګونه د چرګوړو او هګيو د تولید يو فارم جوړ شو.
دغه فارم نن عملاً کار پيل کړ چې د مسوولینو په خبره، د هګيو پر تولید سربېره به دغه فارم د ورځنیو چرګوړو تولید هم کوي چې تر اوسه دا چرګوړي له پاکستانه راوړل کېږي.
په همدې موخه جوړو شوو مراسمو کې د ننګرهار کرنې، اوبو لګولو او مالدارۍ رییس مولوي محمدولي محسن د یاد فارم په پرانیستو خوښي وښوده او په ټولو قانوني چارو کې یي د همکارۍ ډاډ ورکړ.
هغه زیاته کړه، زرګونه یو ورځني چرګوړي له ګاونډیو هېوادونو څخه واردېږي، خو د کرنې اداره هڅه کوي یاد سکټور د یو ورځنیو چرګوړو تولید برخه کې پر ځان بسیا کړي.
دغه راز، د ننګرهار کرنې او مالدارۍ د تولیداتو خونې رییس اجمل رحماني وویل ننګرهار کې د چرګانو تولید سکټور پیاوړتیا لپاره په مختلفو برخو کې کار کوي چې د چرګانو د یاد فارم د پرانیستې موخه هم د دغه سکټور پر پښو درول دي.
رحماني زیاته کړه، په دغه فارم کې به ۲۰ زره چرګې د هګیو او د یو ورځنیو چرګوړو تولید په موخه روزل کېږي.
نوموړي وویل، په یاد فارم کې ۲۰ مسلکي او ۱۵۰ غیر مسلکي کارګرو ته په مستقیم او غیرمستقیم ډول د کار زمینه برابره شوې ده.
د «اخوت» په نوم د دغه فارم د جوړونکي شرکت مسوولين وايي چې اوسمهال پر دغه فارم څه باندې ۳۰ میليونه افغانۍ پانګونه شوې او د وخت په تېرېدو به دا پانګونه لا زیاته شي چې ورسره به تولیدات ډېر او خلکو ته به د کار زمينه برابره شي.
د یادونې ده چې په ننګرهار کې د چرګانو روزنې صنعت ښه وده کړې او دا مهال په کې سلګونه د چرګانونو روزنې فارمونه فعال دي چې زرګونو کسانو ته په کې د کار زمینه هم برابره شوې ده.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن