کابل (پژواک، ۳۰ وږی ۱۴۰۳): د هېواد کرکټ ملي لوبډلې د درېیو نړۍوالو یو ورځنیو سیالیو په دویمه لوبه کې هم سوېلي افریقا ته ماته ورکړه او په دې سره یې روانه لوبلړۍ دوه پر صفر وګټله.
دغه سیالي د افغانستان په کوربهتوب د متحده عربي اماراتو د شارجې لوبغالي کې ترسره شوه.
د نننۍ لوبې پچه افغان لوبډلې وګټله او د سوېلي افریقا پر وړاندې یې لومړی توپوهنه غوره کړه.
په نننۍ سیالۍ کې افغان لوبډلې لومړی توپوهنه ترسره کړه او په ټاکل شوو ۵۰ اورونو کې یې د څلورو لوبغاړو په سوځېدو ۳۱۱ منډې وکړې.
په نننۍ لوبه کې رحمانالله ګربز سلیزه ووهله او په ۱۱۰ توپونو یې ۱۰۵ منډې وکړې، دغه راز عظمتالله عمرزي ۸۶ ناسوځېدلې منډې وکړې.
همدارنګه رحمتشاه ۵۰، ریاض حسن ۱۹ او محمدنبي بیا ۱۳ منډې وکړې.
په مقابل کې سوېلي افریقا ورکړل شوی هدف پوره نه شو کړای او ټوله لوبډله یې په ۳۴م اور کې په ۱۳۴ منډو وسوځېده او د ۱۷۷ منډو په توپیر یې افغانستان ته لوبه وبایله.
د افغانستان له لوري په توپاچونه کې راشدخان پنځه، ننګیال خروټي څلور او عظمتالله یو لوبغاړی وسوځول.
د یادونې ده، افغانستان به له سوېلي افریقا سره خپله درېیمه لوبه د سپټمبر په ۲۲مه ترسره کړي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن