کابل (پژواک، ۴ تله ۱۴۰۳): د قطر د نړۍوالو همکاریو وزیرې لولوه الخاطر ژمنه کړې چې د زدهکړو او روغتیایي مراقبتونو برخو کې د افغانستان د ښځو د ملاتړ لپاره ۷۵ میلیون ډالر مرسته کوي.
هغې د افغان ښځو په اړه د ملګرو ملتونو په ځانګړې ناسته کې په خپله وینا کې زدهکړو ته د ښځو لاسرسی، اقتصادي مشارکت یې او نورې ازاۍ د افغانستان د پرمختګ لپاره اړینې بللې دي.
د قطر د نړۍوالو همکاریو چارو کې د دولت وزیرې د افغان ښځو پیاوړي کولو او د هېواد په راتلونکي کې یې د د هغوی پر برخې اخیستو ټینګار کړی او دغه موخه یې د قطر د اوږدمهالې ستراتیژۍ له اصلي لومړیتوبونه بللې ده.
لولوه الخاطر وویل: «د بشري حقونو نړۍوالې اعلامیې ۲۶مه ماده بیانوي چې ټول د زدهکړو حق لري او موږ ژمن یو څو اطمینان ترلاسه کړو چې ټول افغانان دغه لومړني حق ته لاسرسی لري.»
هغې یادې څرګندونې داسې مهال بیان کړې چې د اسلامي امارت چارواکو په وار وار ویلي، په افغانستان کې د ښځو حقونه د اسلامي شریعت په چوکاټ کې تامین دي او د محصلینو او له شپږم ټولګي پورته نجونو ته د مناسبي فضا په جوړېدو سره به د زدهکړو اجازه ورکړل شي.
GET IN TOUCH
NEWSLETTER
SUGGEST A STORY
PAJHWOK MOBILE APP