پکتیکا کې یو دارالایتام جوړ او ګټې اخیستنې ته وسپارل شو

ښرنه (پژواک، ۵ تله ۱۴۰۳): د پکتیکا په مرکز ښرنه کې د ترکيې هېواد د پنځه سوه زره امریکايي ډالرو په لګښت یو دارالایتام جوړ او ګټې اخیستنې ته وسپارل شو.

د امام بخاري په نوم دغه دارالایتام د ترکيې هېواد د جامعه ندالخیر بنسټ له لوري په درېيو پوړونو کې جوړ شوی دی.

د یاد دارالايتام مشر مولوي صلاح‌الدين کامران وويل چې په دغه دارالايتام کې به څلور سوه یتیمان د ديني زده‌کړو ترڅنګ عصري او د کمپيوټر زده‌کړې کوي.

هغه زیاته کړه: «پر دغه دارالايتام باندې ۵۰۰ زره ډالر لګښت شوی، ټول سهولتونه په کې برابر دي، په درېيو پوړونو کې جوړ شوی، د لومړنۍ تداوي لپاره کلينیک هم په کې شته، د ليلیې لپاره هم ځانګړي اطاقونه لري.»

دغه راز د جامعه ندالخير بنسټ مشر امره کايدال وويل چې په افغانستان کې اړمنو او يتيمانو ته د بشري مرستو ترڅنګ د زده‌کړو زمینه هم برابروي.

هغه زیاته کړه: «دلته له شل کلنې جګړې څخه زرګونه يتمان پاتې شوي، لکه څنګه چې موږ د بيارغونې برخه کې کار کوو، همدا شان غواړو په افغانستان کې د خپلو وروڼو د کونډو او يتيمانو ترڅنګ ودريږو او داسې پروژې ورته اجرا کړو چې د دوی درد دوا کړي.»

همدارنګه د پکتيکا مرستيال والي مخدوم عبدالسلام سعادت وويل چې يتيمانو ته د ژوند د نورو اسانتیاوو ترڅنګ د زده‌کړو زمینه هم برابروي.

هغه زیاته کړه، د اسلامي امارت مشرتابه هوډ لري چې په ټول هېواد کې د يتيمانو د روزنې لپاره دارالايتامونه جوړ کړي.

بل لور ته، د دغه دارالايتام یوه زده‌کوونکي عبدالوکيل وويل چې په دغه مرکز کې دوی ته د قران‌کريم د حفظ ترڅنګ کمپيوټر او نور عصري مضامین هم تدرسېږي.

همدارنګه یو شمېر نورو زده‌کوونکو بیا له حکومتي مسوولینو غوښتنه وکړه چې په ولسوالیو کې دې هم یتیمانو ته د زده‌کړو دغه ډول مرکزونه جوړ کړي.