اسعداباد (پژواک، ۷ تله ۱۴۰۳): د مخابراتو او معلوماتي ټکنالوجۍ وازرت سرپرست کونړ ته د خپل سفر په ترڅ کې ویلي، تېرو درېیو کلونو کې د دغه ولایت په بېلابېلو سیمو کې د ۲۰ نويو مخابراتي سایټونه په جوړېدو سره لسګونه زره کسان له مخابراتي خدمتونو برخمن شوي دي.
د مخابراتو او معلوماتي ټکنالوجۍ وزارت سرپرست مولوي نجیبالله حقاني نن کونړ ولایت ته د خپل سفر په ترڅ کې د دغه ولایت له ځايي مسوولینو او قومي مشرانو سره په غونډه کې وویل، له تېرو درېیو کالونو راهیسې کونړ کې ۲۰ نوي مخابراتي سایټونه جوړ شوي دي.
نوموړي وویل: «د تېرو درېیو کلونو په اوږدو کې د کونړ خلکو اړتیاوو او غوښتونو ته په کتو، د دغه ولایت په یو شمېر لرو پرتو سیمو کې د بېلابېلو مخابراتي شبکو ۲۰ نوي سایټونه فعال شوي دي چې په مټ یې لسګونو زرو کسانو ټلیفوني او انټرنیټي خدمتونو ته لاسرسی پيدا کړی دی.»
هغه زیاته کړه، واک ته د اسلامي امارت په رسېدو سره، ټول هېواد کې له زرو کیلومترو څخه ډېر د نوري پایبر شبکې لاینونه غځېدلي او ترڅنګ یې د کونړ په ګډون په یو شمېر نورو ولایتونو کې نږدې ۵۰۰ د بېلابېلو مخابراتي شبکو نوي سایټونه فعال شوي دي.
نوموړي وویل، په پلان کې لري چې د هېواد په ټولو سیمو کې ټلیفوني او انټرنیټي اسانتیاوې رامنځته او د بیو د ټیټوالي ترڅنګ یې د چټکوالي لپاره هم جدي هڅې وکړي.
هغه د خپل سفر پرمهال کونړ کې د مخابراتو او معلوماتي ټکنالوجۍ ریاست اړوند د کمپیوټر زدهکړو ښوونیز مرکز سره د ۴۰ پایه لپټاپ کمپيوټرونو د مرستې ترڅنګ دغه ریاست کې د ۷.۵ کیلوواټه جوړې شوې لمریزې بریښنايي شبکې پرانېسته هم وکړه.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن