کابل (پژواک، ۷ تله ۱۴۰۳): د روسیې د بهرنیو چارو وزارت وايي چې مسکو، چین، ایران او پاکستان دې پایلې ته رسېدلي چې له اوسنیو افغان چارواکو سره د متقابلو خبرو اترو بل بدیل نشته.
د روسیې د بهرنیو چارو وزارت په یوې خبرپاڼه کې لیکلي چې یاده څلور اړخیزه ناسته د افغانستان په اړه د چین، ایران او روسیې د بهرنیو چارو وزیرانو او د پاکستان د دفاع وزیر ترمنځ ترسره شوې ده.
خبرپاڼه کې راغلي: «ټولو خواوو د افغانستان د حل او فصل پر وړاندې خپلې کړنلارې پرتله کړې او ټینګار یې وکړ چې له اوسنیو افغان چارواکو سره د متقابلو محترمانه خبرو اترو او ګډو اړیکو بل بدیل نشته.»
دا غونډه د ملګرو ملتونو د ۷۹مې عمومي ناستې په څنډه کې جوړه شوې ده.
د یادونې ده، د ملګرو ملتونو ۷۹مه عمومي غونډه تېره اونۍ د سهشنبې په ورځ پیل شوه.
د هېوادونو چارواکي په یاده ناسته کې د بېلابېلو مسایلو په اړه خبرې کوي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن