راتلونکې یکشنبې کابل کې د «امام ابوحنیفه» درېیم نندارتون جوړیږي

کابل (پژواک، ۱۳ تله ۱۴۰۳): د صنعت او سوداګرۍ وزارت وایي، د امام ابوحنیفه درېیم نندارتون چې تر دوو راتلونکو ورځو به په کابل کې جوړ شي، داخلي او بهرني متشبثین او سوداګر به خپل محصولات په کې نندارې کېږدي.

د صنعت او سوداګرۍ وزارت په یوه اعلامیه کې ویلي، دغه نندارتون د روانې تلې میاشتې له ۱۵ مې تر ۲۱مې د افغانستان د سوداګرۍ او پانګونې خونې له خوا د صنعت او سوداګرۍ وزارت، د خصوصي سکټور او اړوندو بنسټونو په همکارۍ په کابل کې د افغانستان نړۍوال نندارتون په مرکز کې پرانیستل کېږي.

د سرچینې په خبره، د بېلابېلو تولیدي سکټورونو، سوداګریز او خدماتي دغه نندارتون کې به د کرنې، صنعت، غالۍ، کانونو، روغتیا، بانکدارۍ، لاسي صنایعو، ماشین‌الاتو، ترانسپورټ، لوجستیک، ساختماني، مخابراتو، تحصیلات او داسې نورو شرکتونو محصولات نندارې ته وړاندې شي.

سرچینې لیکلي چې د دغه لوی نندارتون په څنډه کې د داخلي او بهرني سوداګرو او پانګوالو ترمنځ د تجارتي تواصل ناستې به هم ترسره شي چې دا به د داخلي او بهرنیو شرکتونو ترمنځ د فرصتونو شریکولو، د پانګې د جذب، قراردادونو کولو او نور مناسب فرصتونه برابر کړي.