کابل (پژواک، ۱۴ تله ۱۴۰۳): تېره اونۍ، ا.ا وویل د ځینو بریدونو عاملین چې له بلوچستانه افغانستان ته راغلي وو، نیول شوي، د افغانستان د بهرنیو چارو وزیر د مسکو فارمټ غونډه کې وویل چې دا فارمټ دې د افغانستان او سیمې ترمنځ د همکارۍ پر بهیر بدل شي.
د تېرې اونۍ مهم خبرونه
- متقي: مسکو فارمټ دې د افغانستان او سیمې ترمنځ د همکارۍ پر بهیر بدل شي.
- د مسکو فارمټ ناسته کې د چین او روسیې استازي: غواړو افغانستان د اقتصادي او سیمهییز اتصال پر مرکز بدل شي.
- مجاهد: کابل، بامیان او فاریاب کې د بریدونو عاملین نیول شوي.
- اقتصادي معاونیت د ۱۲ میلیارده افغانۍ پانګونې طرحه تایید کړه.
مرګژوبله:
تېره اونۍ افغانستان کې دوو بېلابېلو پېښو کې درې کسان وژل شوي او اته نور ټپیان وو.
د راپورونو له مخې، د سرپل امنیې قوماندانۍ ویلي، په دغه ولایت کې له پخوا پاتې د راکټ یوې مرمۍ چاودنې د درېیو ماشومانو ژوند اخيستی او دوه نور یې ټپیان کړي دي.
دغهراز، د پنجشېر امنیې قوماندانۍ ویلي، د دعه ولایت په دره ولسوالۍ کې د ګازډبې چاودنه کې د سیمې شپږ اوسېدونکي ټپیان شوي دي.
یادونه: د مرګژوبلې یادې شمېرې پژواک ته د رسېدلو راپورونو له مخې ښودل شوې، خو کېدای شي د ځینو پېښو په اړه یې راپورونه نه وي ترلاسه کړي او یا سرچینو د مرګژوبلې کره شمېرې نه وي ښودلې.
پژواک وړمه اونۍ افغانستان کې د جنایي او امنیتي پېښو له امله د مرګژوبلې راپور نه و تر لاسه کړی.
دا په داسې حال کې ده چې په هېواد کې د ۱۴۰۰ کال د زمري میاشتې له بدلون مخکې د جنایي پېښو ترڅنګ په جګړو کې هره اونۍ سلګونو ملکي وګړو او د ښکېلو غاړو کسانو ته مرګژوبله اوښته.
د مسکو فارمټ ناسته
تېره اونۍ، د افغانستان په اړه د مسکو فارمټ شپږمه مشورتي ناسته د افغانستان، روسیې، هند، ایران، قزاقستان، قرغزستان، چین، پاکستان، تاجکستان، ترکمنستان او ازبکستان په ګډون په مسکو کې ترسره شوه.
د افغانستان د بهرنیو چارو سرپرست وزیر مولوي امیرخان متقي په یاده ناسته کې وړاندیز وکړ چې د کوربه هېواد او د مسکو فارمټ غړو هېوادونو په همکارۍ دې دغه میکانیزم د افغانستان او سیمې ترمنځ د همکارۍ پر بهیر بدل شي.
دغهراز، متقي په یاده غونډه کې د سیمې له هېوادونو غوښتي چې د داعش له لوري د دوی د وګړو د جذب او افغانستان ته یې بیا د رااستولو د مخنیوي په برخه کې لازمې همکارۍ وکړي.
په یاده غونډه کې د چین استازي او د روسیې بهرنیو چارو وزیر، د ا.ا د اقتصادمحوره سیاست او د امنیت برخه کې د اقداماتو هرکلی وکړ ویې ویل، غواړي افغانستان د اقتصادي او سیمهییز اتصال پر مرکز بدل شي.
د روسیې د بهرنیو چارو وزیر، سرګيلاوروف ویلي: «موږ باور لرو چې د افغانستان له اوسني حکومت سره د رغنده خبرو اترو دوام په دې هېواد کې د امنیت، اقتصادي پراختیا او ملي پیوستون په ګټه دي.»
«د دوو بریدونو عاملین له بلوچستانه افغانستان ته راغلي وو»
د روان کال د وږي په ١٢مه د کابل ښار د دارالامان پر سړک د فرمانونو او حکمونو د تعقیب او څارنې عمومي ریاست پر کارکوونکو برید وشو او چارواکو وویل چې شپږ کسان په کې وژل شوي دي.
د اسلامي امارت ویاند ذبیحالله مجاهد تېره اونۍ وویل، د اسلامي امارت ځانګړو ځواکونو د «فتنګرو» د هغه ګروپ مهم غړي نیولي چې د فرامینو او حکمونو د تعقیب او نظارت لوی ریاست پر کارکوونکو یې برید کړی و او په کابل کې په یو شمېر نورو بریدونو او په بامیان ولایت کې په خارجي سیلانیانو برید کې یې هم لاس درلود.
هغه وایي، د یادو بریدونو په تړاو په نیول شوو کسانو کې یو شمېر داسې کسان شته چې تازه د بلوچستان په مستونګ کې د داعش خراسان څانګې له روزنیز کمپ څخه افغانستان ته راغلي وو.
افغانستان کې د پانګونو د طرحو تایید
تېره اونۍ، د افغانستان د اقتصادي معاونیت د وزارتونو ترمنځ د پانګونې کمېټې د پانګونې لپاره د بېلابېلو طرحو له تایید خبر ورکړ او ویې ویل چې ارزښت یې ۱۲ میلیارده افغانۍ بلل کېږي.
د سرچينې د معلوماتو له مخې، د پانګونې دا طرحې، د لمریزې بریښنا د تولید، د ښارګوټو د جوړونې، د الکترونیکي دروازو کمپلکسونه، د هېواد په بندرونو کې د سکنرونو ځای پر ځای کول او د سوداګریز مارکیټونو جوړولو په برخه کې دي.
دغهراز تېره اونۍ، د افغانستان برېښنا شرکت او خصوصي سکټور ترمنځ د ۲۴۰ مېګاواټه برېښنا د توليد هوکړې لاسلیک شوې او یاد شرکت ويلي و، دا مهال په هېواد کې د څلور میلیارد ډالرو په ارزښت د پانګونې فرصتونه شته، له کورنيو او بهرنيو شرکتونو یې وغوښتل چې په دې برخه کې پانګونه وکړي.
د مرستو دوام
تېره اونۍ، قرغزستان له افغانستان سره د ۱۲۰ ټنه اوړو، غوړيو او بورې مرسته وکړه.
GET IN TOUCH
NEWSLETTER
SUGGEST A STORY
PAJHWOK MOBILE APP