«د باریکاب صنعتي پارک د برېښنا کمښت ‎ستونزه دې هواره شي»

کابل (پژواک، ۱۶ تله ۱۴۰۳): د صنعت او سوداګرۍ وزارت وایي، د دغه وزارت یوه پلاوي له خصوصي سکټوره د ملاتړ او د باریکاب صنعتي پارک د زیربنایي او برېښنا د کمښت ستونزو د حل په موخه پروان ولایت ته سفر کړی دی.

د صنعت او سوداګرۍ وزارت خبرپاڼه کې راغلي چې دغه پلاوي د باریکاب صنعتي پارک او د دغه پارک له فابریکو لیدنه وکړه.

سرچینې لیکلي، دغه سفر د هېواد د خصوصي سکټور د ملاتړ او د باریکاب صنعتي پارک د زیربنایي او برېښنا د کمښت ستونزو د حل په موخه شوی دی.

خبرپاڼه کې راغلي چې دغه سفر د صنعت او سوداګرۍ وزارت د پروګرامونو او د نړۍوالو بنسټونو له استازو سره د ترسره شوو ناستو پر بنسټ شوی دی.

سرچینې لیکلي چې په یاد پلاوي کې په کابل کې د چین سفارت او د خصوصي سکټور استازو هم ګډون کړی و.

د صنعت او سوداګرۍ وزارت ویلي چې د افغانستان له خصوصي سکټوره باید ملاتړ وشي او د برېښنا ریاست، بېلابېل نړۍوالې بنسټونه او د چین سفارت دې د خصوصي سکتور د ملاتړ لپاره ګډه همکاري وکړي.