یو افغان د امریکا د ټاکنو پر ورځ د برید پلان جوړولو په تور نیول شوی

کابل (پژواک، ۱۸ تله ۱۴۰۳): د امریکا د متحده ایالاتو عدلیه وزارت وايي، یو افغان د امریکا د ټاکنو پر ورځ د برید د پلان جوړولو په تور نیول شوی دی.

فاکس نیوز تېره ورځ (سه‌شنبه) د امریکا د عدلیه وزارت له قوله راپور ورکړی چې دغه کس د اوکلاهاما ښار اوسېدونکی دی او د امریکا د ټاکنو پر ورځ یې د «ترورستي برید» پلان درلود.

سرچینې ادعا کړې چې نیول شوي کس له داعش ډلې سره اړیکه درلوده.

د سرچینې د معلوماتو له مخې، د تورن کس نوم نصیراحمد توحیدي دی، ۲۷ کلن دی او له افغانستان څخه د امریکایي ځواکونو له وتلو څو اونۍ وروسته د کډوالۍ په ځانګړې ویزې متحده ایالاتو ته تللی و او اوسمهال د خپلې کډوالۍ دوسیې څېړلو ته په تمه دی.

د راپور له مخې، توحیدي له یو بل ځوان سره چې هویت یې معلوم نه دی، دوشنبه ورځ نیول شوی دی.