مهترلام (پژواک، ۲۴ تله ۱۴۰۳): د لغمان سیمهییز مسوولین وایي چې د دغه ولایت په الینګار ولسوالي کې د یوه کانال جوړولو چارې پیل شوې چې د اتو میاشتو په موده کې به بشپړې شي.
د لغمان د والي ویاند عبدالمالک نیازي پژواک خبري اژانس ته وویل، نن د دغه ولایت د الینګار ولسوالۍ اړوند شخترې سیمه کې د یوه کانال جوړېدو چارې پیل شوې.
د نیازي په وینا، یاد کانال به اووه کیلومتره اوږدوالی، دوه متره سور او یونیم متر ژوروالی ولري چې د کرنې او خوړو نړۍوال پروګرام (FAO) په مالي مرسته د ۳۵۰ زرو امریکایي ډالرو په لګښت به یې رغنیزې چارې په اتو میاشتو کې بشپړې شي.
د نوموړي په خبره، د دغه کانال په جوړېدو سره به څلور زره جریب کرنیزه ځمکه خړوبه شي.
ورته مهال، د سیمې اوسېدونکي خوښ دي چې د کرنیزو ځمکو خړوبولو په موخه یې کانال جوړیږي.
د یادونې ده، په لغمان کې تېره میاشت د شاهي کانال لومړي فاز جوړولو چارې هم پیل شوې دي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن