فراه کې څلور کانالونه جوړ او ګټې اخستنې ته وسپارل شول

فراه ښار (پژواک، ۲۸ تله ۱۴۰۳): په فراه کې د ۱۴۰ زره امریکايي ډالرو په لګښت څلور کانالونه جوړ او ګټې اخیستنې ته وسپارل شول.

د فراه د اطلاعاتو او فرهنګ ریاست له لوري پژواک ته په رالېږل شوې خبرپاڼه کې راغلي چې د فراه ښار اړوند په ریګي، مروارید یو، مروارید دوه او په میانجو کليو کې څلور کانالونه جوړ او ګټې اخستنې ته وسپارل شول.

سرچینه وايي چې دغه کانالونه د ۱۴۰ زره امریکايي ډالرو په لګښت د کرنې ریاست تر چتر لاندې د ملګرو ملتونو د پرمختیايي ادارې په همکارۍ په څلورو میاشتو کې جوړ شوي دي.

د سرچینې د معلوماتو له مخې، د یادو کانالونو جوړولو پر مهال ۱۳۰۰ کسانو ته د کار زمینه برابره شوې وه.

د یادونې ده، دغه کانالونه به ۴۷۶ هکټاره ځمکه خړوبه کړي.

دغه راز، د سیمې یوه اوسېدونکي عبدالروف پژواک ته وویل چې مخکې یې هم په سیمه کې کانال موجود و خو اوس یې ورته سنګاري کړی دی.

هغه وايي چې د دغو کانالونو په جوړېدو سره به تر ډېره د دوی په سیمه کې د کروندو د اوبو د کمښت ستونزه حل شي.

د یادو سیمو اوسېدونکي دا هم وايي چې مخکې به د اوبو پر سر د خلکو ترمنځ ستونزې پیدا کېدې خو اوس ورته دروازې لګول شوې او هر څوک به په خپل نوبت اوبه ترلاسه کوي.