پلعلم (پژواک، ۲۸ تله ۱۴۰۳): د لوګر د اطلاعاتو او کلتور ریاست له لوري د ۵۰۰ ځوانانو ترمنځ د سيرت النبي (ص) سیالۍ ترسره شوې.
د لوګر د اطلاعاتو او کلتور ريیس رفیعالله صمیم جوړې شوې غونډې ته وویل، په دې سیالیو کې د مرکز پلعلم او ولسوالیو د ښوونځيو، دیني مدرسو او پوهنتون سلګونه زدهکوونکو ګډون کړی دی.
نوموړي زیاته کړه: «د سیرت النبي (ص) سیالۍ په دوو ورځو کې په مرکز پلعلم کې ترسره شوې چې موخه یې د اسلام ستر پیغمبر حضرت محمد (ص) له ژوند او کارنامو سره د ځوانانو ښه بلدتیا او کتاب او مطالعې ته د ځوانانو رابلل وو.»
د صمیم په وینا، له دې وړاندې هم د لوګر په ازرې، خروار، څرخ او خوښۍ ولسوالیو کې له سلګونو ځوانانو د سيرت النبي (ص) ورته ازموینې اخيستل شوې دي.
د سیرت النبي دغه سیالۍ په لوګر د یتیمانو بنسټ په همکارۍ ترسره شوې.
د دغه بنسټ یوه استازي محمد عارف ستانکزي وویل، د یادې ازموینې له ګډونوالو څخه ۱۶ کسانو بشپړې نومرې ترلاسه کړې دي.
هغه وویل چې دغو ۱۶ کسانو ته د کمپيوټر سربېره بېلابېلې ارزښت لرونکې ډالۍ هم ورکړل شوې.
د دغو سیالیو یوه ګډونوال روح الله پژواک ته وویل، خوښ دی چې په یاده ازموینه کې یې بشپړې نومرې ترلاسه کړي دي.
ده وویل، د داسې ازموینو جوړیدو سره به د ځوانانو لېوالتیا له کتاب او مطالعې سره ډېره شي.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن