ننګرهار کې د یوه سړي د قتل په تور د هغه مېرمن او یو بل کس نیول شوي

جلال‌اباد (پژواک، ۲۸ تله ۱۴۰۳): د ننګرهار امنیه قومانداني وايي، د دغه ولایت په مرکز جلال‌اباد ښار کې یو کس وژل شوی چې په تړاو یې د هغه مېرمن او یو بل کس نیول شوي دي.

د ننګرهار امنیې قوماندانۍ ویاند سید طیب حماد پژواک ته وویل چې پولیسو د جلال‌اباد ښار اوومې ناحیې مربوطاتو کې د یوې مېرمنې په ګډون دوه کسان د قتل په تور نیولي دي.

د حماد د معلوماتو له مخې، نیول شوې مېرمن د وژل شوي کس ښځه ده چې له واده مخکې یې له قاتل سره نامشروع اړیکې درلودې او په ګډه يې د هغه د وژلو پلان جوړ کړی و.

ده زیاته کړې، نیول شوي کسان اوس مهال په یاده اداره کې تر پوښتنو لاندې دي او وروسته به رسماً عدلي او قضايي ارګانونو ته وسپارل شي.