غزه کې پر یوه پنډغالي د اسرایيل بریدونو کې لسګونو کسانو ته مرګ‌ژوبله اوښتې

کابل (پژواک، ۴ لړم ۱۴۰۳): د راپورونو له مخې، د غزې په شمال کې د کډوالو پر «جبالیا» پنډغالي د اسراییل په هوايي بریدونو کې ۱۵۰ کسانو ته مرګ‌ژوبله اوښتې ده.‌

د بي‌بي‌سي عربي د راپور له مخې، په غزې تړانګه کې د ملکي دفاع اداره وایي، دغه برید کې ګڼې ودانۍ ویجاړې او ډېر شمېر خلک ترې لاندې شوي دي.

د راپور له مخې، د غزې په شمال کې د کډوالو پر جبالیا پنډغالي دا هوایي بریدونه تېره ورځ ناوخته شوي دي.

په غزه کې د ملکي دفاع اداره وايي، اسراییلي الوتکو د جبالیا کمپ په الهوجا ګڼ مېشته سیمه کې د استوګنې څو ودانۍ نړولې دي.

د دې ادارې یوه ویاند ویلي چې دا د مرګ‌ژوبلې لومړني راپورونه دي او ښایي دا شمېر نور هم لوړ شي.

د یادونې ده چې اسرایيلي ځواکونو له شاوخوا درېیو اوونیو راهیسې جبالیا پنډغالی کلابند کړی دی.

دغه‌راز څو فلسطیني سرچینو ویلي، روغتیایي ټیمونه د اسراییلو د بمباریو له وېرې دې سیمې ته نشي ورتللی.

په دې تازه بمباریو کې ۱۱ هغه ودانۍ په نښه شوې چې بې ځایه شوي خلک په کې مېشت وو.

د حماس تر واک لاندې روغتیایي چارواکي وایې، د اسراییلو د عملیاتو له پیل راهیسې نږدې ۴۳ زره او ۸۴۷ خپل ژوند له لاسه ورکړی دی.

په دې موده کې له سل زرو ډېر کسان ټپیان شوي هم دي.