مزارشریف (پژواک، ۷ تله ۱۴۰۳): د بلخ یو شمېر اوسېدونکي شکایت کوي چې هېواد کې د ډالرو بیې له لوړوالي سره ډېر ژر د خوراکي توکو بیې هم لوړېږي، خو له ښکته کېدو سره يې بیا د خوراکي توکو نرخونه نه ټيټېږي.
هغوی له حکومته غواړي چې د بیو په کنټرول کې له جدیته کار واخلي.
د راپورونو له مخې، شاوخوا یوه میاشت مخکې یو ډالر نږدې ۷۱ افغانیو پورې تبادله کېده خو دا مهال د یوه ډالر نرخ شاوخوا ۶۷ افغانیو ته راښکته شوی دی.
د اړوندې موضوع په اړه د بلخ د مرکز مزارشریف اوسېدونکي عبدالصمد پژواک خبري اژانس ته وویل، کله چې د ډالرو نرخ لوړ شي سمدستي ورسره د خوراکو توکو بيې هم لوړېږي، خو کله چې ښکته شي بیا نرخونه نه ټيټېږي.
هغه زیاتوي: «یوه میاشت وړاندې چې یو ډالر په ۷۱ افغانۍ و، د یوې بورۍ اوړو بیه ۱۵۰۰ افغانۍ وه اوس چې یو ډالر له ۷۰ افغانیو ښکته شوی، بیا هم د اوړو بیه پخوانۍ ده.»
دغه راز، د مزارشریف ښار یوه بل اوسېدونکي عبدالجبار هم پژواک ته وویل، یوه میاشت وړاندې چې د ډالرو بیه لوړه وه، د لس لېټره غوړیو بیه ۸۲۰ افغانۍ وه خو اوس یې چې نرخ ښکته شوی د غوړو بیه ۹۰۰ افغانۍ ته پورته شوې.
په ورته وخت کې د مزار ښار یوه هټۍوال حمیدالله پژواک ته وویل چې هټۍوال نه شي کولای د توکو نرخونه لوړ یا ښکته کړي، دغه کار باید سوداګر وکړي.
هغه وویل: «مونږ نرخونو کې تغییر نه شو راوستی، که لوړ يې واخلو مجبور لوړ یې خرڅ کړو او که ټیټ يې واخلو بیا يې ټیټ خرڅوو، دا د سوداګرو کار دی چې توکي هټۍوالو ته د ورځې له نرخ سره سم ورکړي.»
یو شمېر نورو کسانو هم ورته څرګندونې وکړې او له حکومته يې د خوراکي توکو د بیو کنټرول غوښتنه وکړه.
په ورته وخت کې د مزارشریف ښاروالۍ د مارکېټونو تنظیم مدیر عزیزالله عزیزي وايي چې ښار کې د نرخونو د کنټرول په موخه یې بیهپاڼې وېشلي او له سرغړونکوو سره به قانوني چلند وشي.
بلخوا، بلخ کې د صرافاتو اتحادیې مسوول عبدالقیوم رحیمي هېواد کې د افغانیو ارزښت لوړېدو لامل له افغانستان څخه د ډالړو قاچاق مخنیوی او په یو شمېر ولایتونو کې د راکړې ورکړې پر مهال د افغانیو رایج کېدل بولي.
دغه راز، د افغانستان بانک ویاند حسیبالله نوري پژواک ته وویل چې دغه بانک د هېواد پولي بازارونه تر څار لاندې لري او د بیو ثبات ساتلو لپاره اړین ګامونه پورته کوي.
دا په داسې حال کې ده چې د یو شمېر نورو ولایتونو اوسېدونکي هم ورته شکایتونه لري او له حکومتي مسوولینو د خوراکي توکو د نرخونو کنټرول غوښتنه کوي.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن