غزني کې د ترافیکي پېښې له امله څلورو کسانو ته مرګ‌ژوبله اوښتې

غزني‌ښار (پژواک، ۱۳ لړم ۱۴۰۳): د غزني امنیه قومانداني وایي چې د دغه ولایت په مرکز کې د یوې ترافیکي پېښې له امله یو کس مړ او درې نور ټپيان شوي دي.

د غزني امنیه قوماندانۍ ویاند ابوخالد سرحدي پژواک ته وویل چې نن له غرمې وروسته د څلورمې امنیتي حوزې اړوند د خرخشي په سیمه کې یو فېلډر او کرولا موټرو ټکر کړی دی.

هغه وايي چې په دې پېښه کې یو کس مړ او دوې ښځې او یو ماشوم ټپیان شوي دي.

دی زیاتوي چې جسد او ټپیان د امنیتي ځواکونو له لوري د غزني حوزوي روغتون ته انتقال شوي دي.

 دا په داسې حال کې ده چې درې ورځې وړاندې هم د غزني په اب بند ولسوالۍ کې د یوې ترافیکي پېښې له امله نهو کسانو ته مرګ ژوبله اوښتې وه.