د بلخ پولیسو په دوو اونیو کې له خلکو غلا شوي ۱۷ موبایلونه بېرته پیدا کړي

مزارشریف (پژواک، ۱۵ تله ۱۴۰۳): د بلخ امنیه قومانداني وایي چې په تېرو دوو اونیو کې یې ۱۷ غلا شوي موبایلونه بېرته پیدا کړي او ورسره په تړاو یې پنځه کسان هم نیولي دي.

په همدې حال کې د مزارشریف اوسېدونکي د امنیې قوماندانۍ هڅې ستایي خو وایي چې لا هم په دغه ښار کې د موبایلو غلا شته او حکومت یې باید مخنیوی وکړي.

د بلخ امنیې قوماندانۍ له لوري نن په خپره شوې خبرپاڼه کې راغلي: «د دې قوماندانۍ د جنايي جرمونو پر وړاندې د مبارزې مدیریت د تېرو دوو اونیو په ترڅ کې ۱۷ سیټه غلا شوي موبایلونه پیدا او شپږ عدده یې نن بېرته خپلو څښتنانو ته وسپارل شول.»

خبرپاڼه زیاتوي، یاد موبایلونه چې د څو میاشتو په جریان کې غلا شوي او دويم او درېیم لاس بېرته خرڅ شوي وو، په تړاو یې څلور کسه شکمن او یو مجرم نیول شوي چې دوسیې به یې اړوندو ارګانونو ته وسپارل شي.

بل لور ته، د مزارشریف ښار د نهمې ناحیې اوسېدونکی عبدالله وایي: «امنیې قوماندانۍ ښه کار کړی چې غلا شوي موبایلونه یې پیدا کړي، خو لا هم په ښار کې د خلکو مبایلونه غلا کېږي او حکومت یې باید مخنیوی وکړي.»

دغه راز، د مزارشریف ښار بل اوسېدونکی جمال‌الدین حبیبي هم وایي، په ښار کې لا هم د خلکو موبایلونه غلا کېږي چې د اندېښنې وړ ده.

نوموړي له امنیتي مسوولینو وغوښتل چې په ښار کې دې چک‌پاینټونه او ګزمې ډېرې کړي او د دغه ډول جرایمو مخنیوی دې وکړي.