د افغانستان کرکټ ملي لوبډله نن له بنګله‌دېش سره دویمه یوه ورځنۍ لوبه کوي

کابل (پژواک، ۱۹ لړم ۱۴۰۳): د افغانستان کرکټ ملي لوبډله د درېیو نړۍوالو یو ورځنیو سیالیو په لړ کې نن له بنګله‌دېش سره خپله دویمه لوبه کوي.

د افغانستان کرکټ بورډ ویلي، ملي لوبډله له بنګله‌دېش سره د روانې لوبلړۍ دویمه لوبه نن ماسپښین دوه‌نیمې بجې ترسره کوي.

د سرچینې په ونیا، افغان لوبغاړو تېره ورځ یادې لوبې ته د ښه چمتووالي په موخه تمرینات ترسره کړل.

دغه راز، د افغانستان او بنګله‌دېش کرکټ لوبډلو ترمنځ دغه سیالۍ د متحده عربي اماراتو په شارجه لوبغالي کې ترسره کېږي.

افغان لوبډلې په لومړۍ یو ورځنۍ لوبه کې بنګله‌دېش ته ماتې ورکړې وه.

د یادونې ده، د افغانستان لوبډله به خپله درېیمه لوبه د روانې اکتوبر میاشتې په ۱۱مه ترسره کړي.