د هېواد په ۱۴ ولایتونو کې د سختو ورښتونو اټکل شوی

کابل (پژواک، ۱۹ لړم ۱۴۰۳): د افغانستان د ترانسپورټ او هوایي چلند وزارت د هېواد په ۱۴ ولایتونو کې د سختو ورښتونو، تالندې، برېښنا او ناڅاپي سېلابونو راتلو له احتماله خبر ورکوي.

یاد وزارت نن (شنبه، د لړم ۱۹مه) پر خپله اېکس‌پاڼه لیکلي چې نن او سبا په بدخشان، تخار، کندوز، بلخ، نورستان، پنجشېر، بغلان، لغمان، کونړ، ننګرهار، پروان، بامیان، سرپل او سمنګان ولایتونو کې د باران، تالندې او برېښنا، ناڅاپي سېلابونو او چټکو بادونو احتمال شته.

سرچینې لیکلي، په بېلابېلو برخو کې د باران کچه له ۱۵ تر ۳۵ ملي مترو اټکل شوې ده.

نوموړي دغه‌راز لیکلي، د هېواد په سوېل ختیځو، مرکزي او لویدیځو ولایتونو کې د شدیدو بادونو او دوړو او خاورو اټکل شوی چې سرعت یې په بېلابېلو ځایونو کې په ساعت کې له ۵۰ څخه تر ۷۰ کیلومترو اټکل کېږي.

د یادې خپرونې په پای کې لیکل شوي چې په لوړو او سردسیره سیمو کې د واورې ورېدو احتمال شتون لري.