قمي: ایران په افغانستان کې د نېمګړو روغتیايي پروژو بشپړېدو ته چمتو دی

کابل (پژواک، ۲۹ لړم ۱۴۰۳): افغانستان لپاره د ایران ځانګړي استازي د ریاست الوزراء سیاسي مرستیال سره په لېدنه کې ویلي، هېواد یې په افغانستان کې د نېمګړو روغتیايي پروژو بشپړېدو ته چمتو دی او دغه راز به په پوهنتونونو کې رغنیزې او علمي پروژې پیل کړي.

د ریاست الوزراء سیاسي معاونیت په خبرپاڼه کې راغلي چې د ریاست الوزراء سیاسي مرستیال مولوي عبدالکبیر د افغانستان لپاره د ایران له سفیر او ځانګړي استازي حسن کاظمي قمي او مل پلاوي سره وکتل.

سرچېنې لیکلي، په دې کتنه کې قمي ایران څخه د افغان بندیانو د رالېږد بهیر په اړه معلومات ورکړل وې ویل، هېواد یې له افغانستان سره په سیاسي، اقتصادي او فرهنګي برخو کې د اړیکو او همکاریو د پراخولو غوښتونکی دی.

قمي ویلي، ایران هڅه کوي د چابهار بندر په فعالولو او پراخولو سره، افغانستان ازادو اوبو ته لاسرسی پیدا کړي.

ده زیاته کړې، ‎ایران په افغانستان کې د نېمګړو روغتیايي پروژو بشپړېدو ته چمتو دی او غواړي د افغانستان په پوهنتونونو کې رغینزې او علمي پروژې پیل کړي.

افغانستان لپاره د ایران ځانګړي استازي د یادو پروژو په اړه معلومات نه دي ورکړي.

د ریاست الوزراء سیاسي مولوي عبدالکبیر هم ویلي، اسلامي امارت له ټولو هېوادونو سره د حسنه اړیکو غوښتوونکی دی او اجازه نه ورکوي چې د افغانستان له خاورې کوم لوري ته ضرر ورسېږي.