مولوي عبدالکبیر: اسلامي امارت متوازن سیاست پر مخ وړي

کابل (پژواک، د لېندۍ لومړۍ نېټه ۱۴۰۳): د اسلامي امارت چارواکو په غزني ولایت کې یوې غونډې ته ویلي چې د اسلامي امارت سیاست خپلواک او ناپېیلی دی او د هرې موضوع پر وړاندې مسوولانه چلند کوي.

له ارګه په خپره شوې خبرپاڼه کې راغلي چې یادې څرګندونې د رياستء‌الوزراء سياسي مرستيال مولوي عبدالكبير او د سرحدونو، قومونو او قبایلو چارو وزارت سرپرست ملا نورالله نوري په غزني ولايت کې په یوه لویه ولسي ناسته کې وکړې.

خبرپاڼه کاږي، د ریاست‌الوزراء سیاسي مرستیال وویل، اسلامي امارت د ډېرو هېوادونو ملاتړ ترلاسه کړی او د سیمې په ګډون له نړۍ سره د ښو اړیکو غوښتونکی دی.

هغه زیاته کړه، د اسلامي امارت سیاست خپلواک او ناپېیلی دی او افغان حکومت متوازن سیاست پر مخ وړي.

دی زیاتوي، اسلامي امارت د کاري فرصتونو رامنځته کېدو لپاره د پانګونې پروسه اسانه کړې او حکومت به له خپلې بودجې ګڼې پروژې هم پیل کړي.

دغه‌راز د سرحدونو، قومونو او قبایلو چارو وزارت سرپرست ملا نورالله نوري وویل چې د ملت د یووالي او اسلامي امارت د مبارزو له امله د امریکا پر وړاندې «جهاد» بریالی شو او اسلامي امارت د هرې موضوع پر وړاندې مسوولانه چلند کوي.

هغه زیاته کړه، پر اسلامي ارزښتونو معاملې ته اجازه نه ورکوي او په نږدې راتلونکي کې به ګڼې نوې پروژې پیل کړي.