له ترکمنستان سره د وارداتي برېښنا تړون د یوه بل کال لپاره وغځول شو

کابل (پژواک، ۱۷ لېندۍ ۱۴۰۳): د افغانستان برېښنا شرکت وايي چې له ترکمنستان سره یې د وارداتي برېښنا تړون د ۲۰۲۵ زېږدیز کال لپاره تمدید کړ.

د افغانستان برېښنا شرکت دغه خبر تېره شپه پر خپله اېکس‌پاڼه خپور کړی دی.

سرچینې زیاته کړې، د افغانستان برېښنا شرکت عمومي اجرائیوي ريیس عبدالباري عمر او ورسره مل پلاوي ترکمنستان هېواد ته په خپل سفر کې د ۲۰۲۵ زېږدیز کال لپاره د برېښنا پېرلو تړون لاسلیک کړی دی.

د سرچینې د معلوماتو له مخې، د دغه تړون پر بنسټ به په څلورو مسیرونو (اندخوی، اقینې، بادغیس او تورغونډۍ ـ هرات) کې له ترکمنستانه افغانستان ته برېښنا وارد شي.

دا چې ترکمنستان افغانستان ته د یاد تړون له مخې څومره برېښنا ورکوي، په اړه یې سرچینې معلومات نه دي ورکړي.

د افغانستان برېښنا شرکت د روانې لېندۍ میاشتې په پنځه له تاجکستان سره هم د وارداتي برېښنا تړون د ۲۰۲۵ زېږدیز کال لپاره تمدید کړی دی.