اسلامي امارت: د افغانستان اقتصادي وضعیت په اړه د نړۍوال بانک ډېرې موندنې له عیني واقعیتونو لرې دي

کابل (پژواک، ۱۷ لېندۍ ۱۴۰۳): د ریاست‌الوزراء اقتصادي معاونیت د افغانستان د اقتصادي وضعیت په اړه د نړۍوال بانک موندنې له عیني واقعیتونو لرې بللې او ويلي یې دي، غوره ده چې نړۍواله ټولنه د حقایقو په واقعي درک سره له افغان حکومت سره مثبت تعامل ته مخه کړي.

نړۍوال بانک په یوه راپور کې ویلي، د افغانستان اقتصاد سره له دې چې په منځنۍ کچه وده لري خو لا هم د مالي محدودیتونو، سوداګریزې ناانډلۍ او د عمومي پانګونو د محدودو ظرفیتونو په ګډون له ګڼو جدي ننګونو سره مخ دی.

د دغه بانک په راپور کې راغلي چې د کورني ناخالص تولید د منځنۍ ودې کچه ۲ اعشاریه ۷ سلنه ده خو بیا هم په یاد راپور کې دغه وده ډاډمنه نه ده بلل شوې.

د ریاست‌الوزراء اقتصادي معاونیت له لوري نن په خپره شوې خبرپاڼه کې راغلي چې د افغانستان اقتصادي وضعیت په اړه د نړۍوال بانک له لوري د روان ۲۰۲۴ زېږدیز کال د ډسمبر میاشتې په لومړیو کې راپور خپور شوی دی.

خبرپاڼه کاږي، په دغه راپور کې نړۍوال بانک د افغانستان اقتصادي وضعیت په اړه خپلې موندنې شریکې کړې دي چې ډېرې یې له عیني واقعیتونو لرې دي.

د خبرپاڼې په حواله، د اسلامي امارت د ریاست‌الوزراء اقتصادي معاونیت د اقتصادي وضعیت په تړاو منعکس شوې موندنې ردوي.

خبرپاڼه کې دغه راز لیکلي شوي، سره له دې چې په نشر شوي راپور کې د کورني ناخالص تولید ودې، د بهرنیو اسعارو پر وړاندې د افغانۍ ارزښت او صادراتو کچې ثابت پاتې کېدو، د کورنیو عوایدو د ټاکل شوي هدف ترلاسه کېدو، د خوراکي توکو بیو ټیټېدو او د کورني صنعت او بانکي سکټور کې شوي پرمختګ ته اشاره شوې خو په یادو برخو کې وړاندې شوې د ودې سلنه او پرمختګونه تر دې هم لوړ او زیات دي.

د خبرپاڼې په حواله، په راپور کې راغلي چې د بې‌کارۍ کچه لوړه، د زېربنایي پروژو نه پیل او د پانګونې کچه محدوده ده خو د اسلامي امارت په راتګ سره په بېلابېلو سکټورونو کې د بېلابېلو لکه قوش‌تېپې ملي کانال، ټاپي، لویو لارو او بندونو، اوسپنې پټلۍ او برېښنا د تولید پروژو پیل د بېلګې په ډول یادولی شو.

خبرپاڼه کې راغلي، یوازې د ستر مقیاس کانونو برخه کې شاوخوا ۴۱۵ میلیارده افغانۍ کورنۍ او بهرنۍ پانګونه او په نورو برخو کې هم ورته پانګونې جذب شوې دي.

د خبرپاڼې د معلوماتو له مخې، غوره ده چې نړۍواله ټولنه د حقایقو په واقعي درک سره له افغانستان سره مثبت تعامل ته مخه کړي، له دې سره به افغانستان په اقتصادي برخه کې نور هم پرمختګ وکړي.