بدخشان کې د دوو کلیو اوسېدونکو ترمنځ درې کلنه شخړه پای ته ورسېده

فیض‌اباد (پژواک،۲۰ لیندۍ ۱۴۰۳): بدخشان کې ځايي مسوولین وايي، د دغه ولایت د کوف‌اب ولسوالۍ د «غزون» او «دراج» سیمو اوسېدونکو ترمنځ درې کلنه دښمني د ځايي مسوولینو او قومي مخورو په منځګړيتوب پای ته ورسېده.

د بدخشان د اطلاعاتو او فرهنګ رییس انجینیر ذبیح‌الله امیري وايي، یاده شخړه چې له درېیو کلونو راهیسې د کوف‌اب ولسوالۍ د «غزون او دراج» سیمو اوسېدونکو ترمنځ روانه وه، د ځايي مسوولینو، مخورو او د دغه ولایت له نشه‌يي توکو سره د مبارزې کمېسیون د مسوول ملا جمعه‌خان د هڅو په پایله کې نن سهار د یوې ناستې په ترڅ کې پای ته ورسېده.

نوموړي زیاته کړه، دواړو خواوو ژمنه وکړه چې وروسته له دې به د وروڼو په څېر ژوند کوي او د سیمې په ابادۍ به فعاله ونډه واخلي.

هغه د یادې شخړې لامل په اړوندو کلیو کې د څرځایونو پر سر اختلاف وښود او وايي، کله کله به یې ترمنځ فزیکي شخړې هم کېدې.

هغه زیاتوي، خپله خلک له شخړې په تنګ وو او د سولې غوښتونکي وو چې په پایله کې مسوولینو ګام پورته کړ، د مخورو، دیني عالمانو او ځايي مسوولینو په شتون کې یې یو بل په غېږ کې ونیول او سوله یې وکړه.