لغمان کې د ترافیکي پېښې له امله ۷ کسانو ته مرګ‌ژوبله اوښتې

مهترلام (پژواک، ۲۱ لېندۍ ۱۴۰۳) : د لغمان امنیه قومانداني وایي، د کابل ــ جلال اباد پر لویه لار د یوې ترافیکي پېښې له امله یوه کسخپل ژوند له لاسه ورکړی او شپږ تنه نور ټپیان دي.

د لغمان امنیه قومندانۍ ویاند یونس یوسفزی پژواک خبري اژانس ته وویل چې یاده ترافیکي پېښه نن ماښام شاوخوا شپږ بجې د کابل ــ جلال اباد په لویه لار د عزیزخان کڅ سیمه کې د یوې کرولا او الټو موټرو تر منځ د ټکر له امله رامنځته شوې ده.

ده زیاته کړه، په دغه پېښه کې یوه تن خپل ژوند له لاسه ورکړی او شپږ تنه نور ټپیان دي.

یوسفزی وایي، د پېښې ټپیان د ښې درملنې په موخه ننګرهار حوزوي روغتون ته لېږدول شوي دي.