غزني کې په دوو جلا ترافیکي پېښو کې شپږ کسان ټپیان شوي

غزني‌ښار (پژواک، ۱۱ مرغومی ۱۴۰۳): د غزني ولایت په مرکز او جاغوري ولسوالۍ کې په دوو جلا ترافیکو پېښو کې شپږ کسان ټپیان شوي دي.

د غزني امنیې قوماندانۍ ویاند ابوخالد سرحدي پژواک خبري اژانس ته وویل چې پرون مازدیګر د جاغوري ولسوالۍ اړوند په غجور بازار کې دوو موټرو ټکر کړی چې له امله یې درې کسان ټپیان شوي دي.

هغه دغه راز وايي چې دویمه پېښه تېره شپه ناوخته د مرکز اړوند د روضي کوتل سیمه کې د یوه باروړونکي او کاسټر موټرو د ټکر له امله شوې ده.

د نوموړي په خبره، په دې پېښه کې هم درې کسان ټپیان شوي دي.

سرحدي وویل، د لویو لارو ساتونکو له لوري د یادو پېښو ټپیان د غزني ملکي روغتون ته لېږدول شوي دي.

هغه د یادو پېښو لامل د موټرچلوونکو له لوري د ترافیکي اصولو په پام کې نه نیول یاد کړل.

دا په داسې حال کې ده چې تېره ورځ هم په غزني کې د یوې ترافیکي پېښې له امله د یوې کورنۍ اتو کسانو ته مرګ‌ژوبله اوښتې وه.