غزني کې د فوټسال سیالۍ د عصر جدید لوبډلې په اتلولۍ پای ته ورسېدې

غزني‌ښار (پژواک، ۱۵ مرغومی ۱۴۰۳): په غزني کې د ۲۰ لوبډلو ترمنځ د فوټسال پيل شوې سیالۍ د عصر جدید لوبډلې په اتلولۍ پای ته ورسېدې.

د غزني د ورزش امر بلال مجاهد پژواک خبري اژانس ته وویل، یادي سیالۍ د غزني د مرکز اړوند د قلعه شاده کلي په مولا علي جمنازیوم کې د ورزشي ادارې په همغږۍ ترسره شوې.

هغه زیاته کړه، دا سیالۍ یوه میاشت مخکې پیل شوې وې چې پایلوبه د عصر جدید او  قلعه شاده فوټسال لوبډلو ترمنځ ترسره شوه.

هغه وايي چې عصر جدید لوبډلې سیالې لوبډلې ته څلور د درې پر وړاندې په ماتې ورکولو سره اتلولي ترلاسه کړه.

هغه زیاته کړه چې دغه سیالس د ورزشکارانو ترمنځ د یووالي رامنځته کېدو، تفریح  او له نشه‌یي توکو د ځوانانو مخنیوي په موخه ترسره شوې.

بل لور ته، لوبغاړي هم د دغو سیالیو ترسره کېدو ته خوښ دي.

د یادو سیالیو لوبغاړي امین‌الله پژواک ته وویل، دا ډول سیالۍ د فوټسال لوبغاړو ترمنځ پياوړې اړیکې رامنځته کوي.

نوموړي وویل، د فوټسال فدراسیون ته په کار ده چې په دغه ولایت کې لوبغاړو ته ډېرې اسانتیاوې برابرې کړي.