د تېرو اوو ورځو په پرتله نن کابل کې د نفتي توکو، سرو زرو او ځینو خوراکي توکو بیې لوړې شوې

کابل (پژواک، ۲۹ مرغومی ۱۴۰۳): د تېرو اوو ورځو مخکې په نسبت نن کابل ښار کې د افغانۍ پر وړاندې د امریکايي ډالر د ارزښت لوړېدو ترڅنګ د عربي سرو زرو، نفتي توکو، اوړو، بورې او غوړیو بیې لوړې شوې دي.

د کابل ښار په شهزاده سرای کې د «صداقت» صرافۍ مالک حاجي محمدحسین پژواک خبري اژانس ته وویل چې نن د یوه امریکایي ډالر د پېر بیه ۷۳ اعشاریه ۳۰ افغانۍ ده او زر پاکستانۍ کلدارې په ۲۵۵ افغانیو بدلېږي.

په داسې حال کې چې د روان کال د مرغومي میاشتې په ۲۲مه د یوه امریکايي ډالر د پېر بیه ۷۲ اعشاریه ۲۰ افغانۍ وه او زر پاکستانۍ کلدارې په ۲۵۳ افغانیو تبادله کېدې.

حاجي محمدحسین د افغانۍ پر وړاندې د امریکايي ډالرو د ارزښت لوړېدو په اړه وویل، خلک ډېری افغانۍ په ډالرو بدلوي چې له امله یې په بازارونو کې امریکايي ډالر کم شوي او ارزښت یې لوړ شوی دی.

د خوراکي توکو بیې

کابل ښار کې د خوراکي توکو د سوداګرو اتحادیې رییس زمري صافي وویل چې د تېرې شنبې په پرتله نن په عمده ډول د ۴۹ کیلوګرامه قزاقي اوړو بیه له ۱۳۵۰ څخه ۱۳۷۰ افغانیو، ۱۶ لېتره مالیزیايي غوړيو بیه له ۱۷۵۰ څخه ۱۸۰۰ افغانیو او ۴۹ کیلوګرامه هندي بورې بیه له ۲۴۵۰ څخه ۲۶۰۰ افغانیو ته لوړه شوې ده.

د صافي په وینا، د افغانۍ پر وړاندې د امریکايي ډالرو د ارزښت لوړېدو له امله د یادو توکو بیې هم د کابل ښار په بازارونو کې لوړې شوې دي.

خو سرچینه وايي چې نن هم لکه د تېرې شنبې په څېر په عمده ډول ۲۴ کیلوګرامه لومړۍ سېله پاکستاني وریجې په ۲۶۰۰ افغانۍ، یو کیلوګرام افریقایي تور چای په ۴۰۰ او یو کیلوګرام اندونیزیایي شین چای په ۳۵۰ افغانیو پلورل کېږي.

د ځينو توکو پرچون او عمده بیې په یو شمېر مواردو کې لږ خو په ځینو کې بیا ډېر توپیر لري.

د کابل ښار په دهن‌باغ سیمه کې د خوراکي توکو یوه پرچون پلورونکي حامد صوفي‌زاده وویل، نن په پرچون ډول ۴۹ کیلوګرامه قزاقي اوړه په ۱۴۲۰ افغانۍ، ۲۴ کیلوګرامه لومړۍ سېله پاکستانۍ وریجې په ۲۶۵۰ افغانۍ، ۴۹ کیلوګرامه هندۍ بوره په ۲۶۵۰ افغانۍ، ۱۶ لېتره مالیزیايي غوړي په ۱۸۵۰ افغانۍ، یو کیلوګرام اندونیزیایي شین چای په ۴۰۰ افغانۍ او یو کیلوګرام افریقایي تور چای په ۴۵۰ افغانۍ پلورل کېږي.

د نفتي توکو بیې

د «احمدیار ګروپ» تېلو ټانک یوه کارکوونکي وویل چې نن د تېرې شنبې په پرتله د یو لېتر پټرولو بیه له ۶۱ څخه ۶۲ افغانیو او د یوه لېټر ډیزل بیه له ۵۹ څخه ۶۲ افغانیو ته لوړه شوې ده.

دغه‌ راز، د کابل ښار په کلوله پشته کې د محمدشریف په نوم د ګاز یوه پلورونکي وویل چې نن د تېرو اوو ورځو په پرتله د یوه کیلوګرام اوبلن ګاز بیه له ۵۴ څخه ۵۶ افغانیو ته لوړه شوې ده.

د سرچینې په وینا، د نړۍوالو بیو لوړېدو له امله د کابل ښار په بازارونو کې هم د نفتي توکو بیې لوړې شوې دي.

د سرو زرو بیې

د کابل په تیمورشاهي واټ کې د حاجي حامد صالح‌زاده زرګرۍ مالک محمدفواد وايي چې نن د تېرې شنبې په پرتله د‎ یو ګرام ۷۵۰ عیار عربي سرو زرو بیه له ۵۱۰۰ څخه ۵۱۵۰ افغانیو ‎ته لوړه شوې ده.

خو نوموړی وايي چې نن تېرو اوو ورځو ته ورته یو ګرام ٥٨٥ عیار روسي سره زر په ۴۱۰۰ افغانیو پلوري. ‎

د سرو زرو د پلورونکو په خبره، په کابل ښار کې د سرو زرو د بیو بدلون، په نړۍوالو بازارونو کې د هغو د بیو له بدلون سره تړاو لري.