فېروزکوه (پژواک، د وري لومړۍ نېټه ۱۴۰۴): د روژې میاشتې له پیل سره د غور په مرکز فېروزکوه ښار کې د ۱۲ لوبډلو ترمنځ د فوټسال د رمضاني جام سیالۍ د «ارين سيکلت» لوبډلې په بريا پای ته ورسېدې.
د غور د فوټبال فدراسيون مسوول جانمحمد حيدري پژواک خبري اژانس ته وويل چې پرون (پنجشنبه) مازدیګر د دغو سياليو پاى لوبه د «ارين سيکلت» او «باران» لوبډلو ترمنځ وشوه چې په پایله کې یې ارين سيکلت ټيم د باران لوبډلې ته څلور پر درې ماته ورکړه او د دغو سیالیو اتلولي یې خپله کړه.
هغه وویل چې په دغو سياليو کې د باران لوبډلې دويم مقام وګاټه.
د غور د فوټبال فدراسيون مسوول زیاته کړه چې دغه سيالۍ د ورزش د ودې، د ځوانانو د یووالي او د روژې د مياشتې د هرکلي په موخه د درېيو اونيو لپاره په فېروزکوه ښار کې ترسره شوې.
د فوټسال د دغو سياليو ترسره کېدل د غور اوسېدونکو له تاوده هرکلي سره مخ شوي، د فېروزکوه يو شمېر اوسېدونکي دغه ډول لوبې د ورزش د ودې لپاره اغېزناکې بولي او د لا ډېرېدو غوښتنه یې کوي.
GET IN TOUCH
NEWSLETTER
SUGGEST A STORY
PAJHWOK MOBILE APP