<p style="text-align: justify;">کابل (پژواک، ۳ وری ۱۴۰۴): د بهرنیو چارو وزارت سرپرست په کابل کې د قطر له شارژدافیر سره د افغانستان او قطر د دوهاړخیزو اړیکو او له امریکا سره د ا.ا د اړیکو پر وروستیو پرمختګونو خبرې وکړې.</p>
<p style="text-align: justify;"> تېره اونۍ یوه امریکایي پلاوي کابل ته سفر وکړ او له هغه وروسته د افغانستان بهرنیو چارو وزارت اعلان وکړ چې د متحده عربي اماراتو او قطر په منځګړیتوب یې د یوه بشر دوستانه اقدام په ترڅ کې یوه بندي جورج ګلزمن له بنده خوشې کړ.</p>
<p style="text-align: justify;">اسلامي امارت د یاد امریکایي پلاوي سفر یو مثبت ګام بللی و.</p>
<p style="text-align: justify;">د بهرنیو چارو وزارت په خبرپاڼه کې راغلي چې د دغه وزارت سرپرست مولوي امیرخان متقي په کابل کې د قطر دولت شارژدافیر مُردِف القاشوطي وکتل او په دې ناسته کې د افغانستان او قطر پر دوو اړخیزو اړیکو، متحده ایالتونو سره پر وروستیو پرمختګونو او پر یو لړ نورو مسایلو خبرې وشوې.</p>
<p style="text-align: justify;">یاد وزارت لیکلي چې متقي متحده ایالتونو سره وروستی پرمختګ مهم وباله او د قطر دولت له اسانچارۍ او همکارۍ یې هم مننه وکړه.</p>
<p style="text-align: justify;">بهرنیو چارو وزارت وایي، امیر خان متقي قطر سره د افغانستان اړیکې مخ پر ودې وبللې او هیله یې څرګنده کړه چې د دواړو هېوادونو اړیکې لا زیات پرمختګونه ولري.</p>
<p style="text-align: justify;">خبرپاڼه کې راغلي چې د قطر شارژدافیر پر خپل وار د ا.ا.ا. بهرنیو اړیکو کې پرمختګونه مثبت وارزول او افغانستان سره یې د خپل هېواد د همکاریو ژمنتیا تکرار کړه.</p>
<p style="text-align: justify;"></p>
