اسرائیلو غزه کې پر یوه روغتون برید کړی او پنځه کسانو ژوند له لاسه ورکړی

کابل (پژواک، ۴ وری ۱۴۰۴): د راپورونو له مخې، اسرائیلو تېره ورځ په غزه کې پر یوه روغتون هوايي برید کړی چې په پایله کې د حماس غورځنګ د سیاسي دفتر د یوه غړي په ګډون پنځو کسانو ژوند له لاسه ورکړی.

رویټرز خبري اژانس راپور ورکړی چې اسرائیلو دغه هوایي برید تېره ورځ کړی دی.

د غزې روغتیا وزارت ویلي چې یاد برید د خان یونس په ناصر روغتون کې د جراحۍ په څانګه شوی دی.

حماس جنبش ویلي چې د دوی د سیاسي دفتر یو غړی اسماعیل برهوم هم په دغه برید کې ژوند له لاسه ورکړی دی.

همداراز، د غزې روغتیا چارواکو ویلي چې د اسرائیلو د تېرې ورځې پر رفح او خان ​​یونس کې د بریدونو په پايله کې لږ تر لږه ۴۵ کسانو ژوند له لاسه ورکړی.

دا په داسې حال کې ده چې اسرائیلو له څو ورځو راهیسې یو ځل بیا پر غزې هوايي بریدونه پیل کړي، چې له امله یې سلګونه کسانو خپل ژوند له لاسه ورکړی دی.