ګردېز (پژواک، ۵ وري ۱۴۰۴) د پکتيا د اطلاعاتو او فرهنگ رياست لخوا نن د لسګونه حافظانو تر منځ د حسن قرائت سيالي ترسره شوه.
د مسوولينو په خبره، په يادو سياليو کې د مرکز ګردېز سربيره د بيلابيلو ولسواليو څخه لسګونه حافظانو ګډون کړی و.
د پکتيا د اطلاعاتو او کلتور رياست د ځوانانو چارو امر سيفالرحمن وهاج وويل چې په تېر يو کال کې يې ۱۵ بيلابيلې علمي سيالۍ ترسره کړې دي.
دی زياتوي چې په يادو علمي سياليو کې يې د عصري او ديني زده کړو سيالۍ وې چې موخه يې د ښوونځي او مدرسې تر منځ فاصلې ختمول دي.
هغه زياته کړه چې له نننۍ سيالۍ يې موخه د ځوانو حافظانو تشويق او د غوره قرائت کوونکو قاریانو په نښه کول وو.
په ورته وخت کې د يادو سياليو يو شمېر ګډونکونکي هم خوښي څرګندوي.
د قرانکریم یوه حافظ، حافظ الله سيرت وويل چې دا ډول سيالۍ د ځوانو قاريانو د تشويق او هڅونې لپاره خورا مهمې دي.
ده غوښتنه وکړه چې دا ډول سيالۍ بايد د ولايتونو ترمنځ هم برابرې شي.
يو بل ګډونوال قاري نصيراحمد وويل چې دا ډول سيالۍ بايد د ولايت تر څنګ د هېواد په کچه هم ترسره شي.
مسوولينو وويل چې په نږدې راتلونکي کې به ورته سيالۍ د ولايتونو ترمنځ هم برابرې کړي.
GET IN TOUCH
NEWSLETTER
SUGGEST A STORY
PAJHWOK MOBILE APP