د افغانستان بانک راتلونکې شنبې ۱۵ میلیونه امریکایي ډالر لیلاموي

کابل (پژواک، ۷ وری ۱۴۰۴): د افغانستان بانک وايي، راتلونکې شنبه (د وري ۹ مه) د داوطلبۍ له لارې ۱۵ میلیون امریکایي ډالر لیلاموي.

یاد بانک نن پر خپله اېکس‌پاڼه له سوداګریزو بانکونو، د صرافۍ او د پولي خدمتونو پر شرایطو برابرو شرکتونو غوښتي څو په دې داوطلبۍ کې ګډون وکړي.

سرچینې لیکلي، د داوطلبۍ ګټونکي اړ دي څو خپل حسابونه د لیلام ورځې تر پایه تصفیه کړي.

د سرچینې د معلوماتو له مخې، د اسعارو د لیلام په داوطلبۍ کې د معاملاتو قسمي تسویې ته اجازه نه ورکول کېږي، د داوطلبۍ ګټونکي اړ دي چې د خپل ذمت د قیمت پیسې په یو ځل په نغدي ډول په ټاکلي موده کې د افغانستان بانک ته وسپاري.