د دولتي ادارو له اختر وروسته کاري مهالوېش اعلان شو

کابل (پژواک، ۹ وری ۱۴۰۴): د کار او ټولنیزو چارو وزارت اعلان کړی چې د کوچني اختر په مناسبت به دولتي ادارې د شوال میاشتې له لومړۍ نېټې چې د اختر له لومړۍ ورځې سره برابره ده، بیا د دې میاشتې تر درېیمې پورې رخصت وي.

یاد وزارت نن (شنبه) د یوې اعلامیې په خپرولو ویلي چې په دولتي ادارو کې کاري وختونه له اختر وروسته ۸ بجې پیلېږي او د مازدیګر ۴ بجې پای ته رسېږي او له ۱۲ تر ۱ پورې یو ساعت وقفه ده.

د یاد وزارت په وینا، پنجشنبه ورځ به کاري ساعتونه پرته له وقفې د سهار له ۸ بیا د ماسپښین تر یوې پورې وي.