اسعداباد (پژواک، ۱۱ وری ۱۴۰۴): د کونړ د مرکز اسعداباد ښار یو شمېر اوسېدونکي شکایت کوي چې په ښار کې د ډېرې ګڼېګوڼې او بېنظمۍ له امله نه شي کولای خپلو ورځنیو چارو ته سمه رسېدنه وکړي.
د کونړ د مرکز اسعداباد ښار یو شمېر اوسېدونکي وايي، ښار کوچنی او د ماسټر پلان خلاف جوړ شوی او دغه راز پهکې د خلکو شمېر هم ډېر دی چې له امله یې ګڼهګوڼه او بېنظمۍ ډېرې شوې دي.
د اسعداباد ښار یوه اوسېدونکي شوکتالله اعتمادي پژواک خبري اژانس ته وویل، په تېرو کلونو کې په ښار کې د ماسټر پلان خلاف په خپلسرې توګه د ودانیو جوړېدل، د نفوس زیاتوالی او نوره بېنظمي هغه څه دي چې اوس یې د ښاریانو پر وړاندې ستونزې جوړې کړې دي.
هغه زیاته کړه: «په تېرو کلونو کې اسعداباد ښار کې ۹۵ سلنه ودانیزې چارې د ماسټر پلان خلاف ترسره شوې دي، ښار ډېر کوچنی دی، د خلکو شتون پهکې زیات دی چې کنټرولول یې ستونزمن کار دی.»
د اسعداباد ښار یوه بل اوسېدونکي حمیدالله ځواکمن وویل، په ښار کې د ګڼېګوڼي او ترافیکي حجم له امله دوی نه شي کولای خپل ناروغان پر وخت تر روغتونه ورسوي.
هغه زیاته کړه: «یو ناروغ چې تر روغتونه رسوو، په ساعتونو موږ انتظار باسو؛ ځکه ښار ډېر کوچنی دی او د خلکو او موټرو ګڼهګوڼه پهکې څو چنده ډېره ده.»
د نوموړي په خبره، که حکومت دغه ښار له یوې مخې وران نه کړي او پر ځای یې له ماسټر پلان سره سم نوی ښار جوړ نه کړي، ستونزمنه ده چې په ښار کې دې د اوسنۍ بېنظمۍ او ګڼېګوڼې مخه ونیول شي .
د اسعداباد ښار اړوند د لومړۍ ناحیي د ګذز وکیل ابراهیم باچا وویل، پخوا په اسعداباد ښار کې د خلکو نفوس کم و، اوس چې نفوس ډېر شوی، حکومت دې د ښار حلقوي سړکونه او پلې لارې پراخ کړي او د ښار په بېلابېلو برخو کې دې هوایي پلونه جوړ کړي.
په همدې حال کې د اسعداباد ښاروال هم مني چې د نفوس ډېروالي او د ښار کوچنیوالي له امله بېنظمي او د خلکو ګڼه ګوڼه زیاته شوې ده.
د اسعداباد ښاروال مولوي نظرمحمد عتیق وویل: «رښتیا هم تېرو کلونو کې چې د ښار په بېلابېلو برخو کې څومره ودانیزې چارې ترسره شوې، ټولې یې د ماسټر پلان خلاف دي، پلې لارې کوچني او د ښار پراخوالی هم کم دی، زموږ هڅه دا ده چې په ښار کې د نورو خپلسرو ودانیزو چارو مخه ونیسو.»
هغه زیاته کړه، هڅې یې پيل کړې چې د ښار په بېلابېلو برخو کې څلور اساسي پلونه جوړ کړي چې په مرسته به یې تر ډېره د شته ګڼېګوڼې او بېنظمۍ مخه ونیول شي.
GET IN TOUCH
NEWSLETTER
SUGGEST A STORY
PAJHWOK MOBILE APP