د ضرب‌الاجل له پای ته رسېدو سره په اسلام‌اباد کې پولیسو د افغانانو نیولو لپاره په اقداماتو لاس پورې کړی

کابل (پژواک، ۱۲ وری ۱۴۰۴): د راپورونو له مخې، پاکستان کې د افغان کډوالو نیولو او له دغه هېواده د هغوی د ایستلو لړۍ د کوچني اختر  په مناسبت تر لسو نورو ورځو ځنډول شوې ده، خو پاکستانۍ رسنیو ويلي چې دغو کډوال ته ورکړل شوی ضرب‌الاجل پای رسېدلی او پولیسو په دې برخه کې اقدامات پیل کړي دي.

په پاکستان کې ناقانونه افغان کډوالو ته د وتلو ورکړل شوی ضرب‌الاجل پرون (د مارچ ۳۱مه) پای ته ورسېد.

پاکستانۍ رسنۍ اج نیوز تازه راپور ورکړی چې د ضرب‌الاجل د پای ته رسېدو له نېټې وروسته د اسلام‌اباد پولیسو په بېلابېلو سیمو کې اقدامات پیل کړي او ګڼ افغان کډوال یې نیولي دي.

په راپور کې دغه راز راغلي چې پاکستاني پولیسو د اپرېل په لومړۍ نېټه سهار وختي د اسلام‌اباد په ترنول، باره کو، غوري ټاون سیمو او راولپنډۍ کې عملیات کړي او لسګونه افغانان یې نیولي دي.

خو بلخوا بیا اسوشیټېډ پرېس پرون مازدیګر په یوه راپور کې لیکلي، د هغو اسنادو له مخې چې دغه اژانس ترلاسه کړي، په پاکستان کې د افغان کډوالو نیولو او له دغه هېواده د هغوی د ایستلو لړۍ د اختر رخصتیو له امله تر لسو نورو ورځو پورې ځنډول شوې ده.

دا په داسې حال کې ده چې پاکستانۍ ورځپاڼې ډان راپور ورکړی چې د راولپنډۍ د پولیسو قوماندان د هغو افغانانو د نیولو او ایستلو امر کړی چې قانوني اسناد نه لري.

دغه راز، د کډوالو او راستنېدونکو چارو وزارت سرپرست له کوربه هېوادونو غوښتي څو د افغان کډوالو په زور ایستلو لړۍ ودروي.

د کډوالو او راستنېدونکو چارو وزارت سرپرست مولوي عبدالکبیر ویلي: «له ګاونډیو هېوادونو غواړو څو د افغان کډوالو له اجباري ایستلو ډډه وکړي؛ دا زموږ مسوولیت دی څو هغه افغانان چې هېواد ته راستنېږي او بېځایه شوي، خپلو اصلي سیمو ته ورسوو.»

دا په داسې حال کې ده چې مخکې له دې د بښنې نړۍوال سازمان هم له پاکستانه غوښتي چې د افغان کډوالو د اجباري ایستلو لړۍ ژر تر ژره ودروي.

د ملګرو ملتونو له خوا د وړاندې شوو شمېرو له مخې، په تېره یوه میاشت کې ۸۴۵ زره افغانانو له پاکستانه وتلي دي.

د خپرو شوو راپورونو له مخې، اوس مهال په پاکستان کې شاوخوا درې میلیون افغانان ژوند کوي چې له دې ډلې یو میلیون یې د اوسېدو قانوني اسناد نه لري.