د هند د ګجرات ایالت یوې کارخونه کې چاودنې ۲۷ کسانو ته مرګ‌ژوبله اړولې

کابل (پژواک، ۱۳ وری ۱۴۰۴): د هند د ګجرات ایالت، دیسا ښار کې د اورلوبې د محصولاتو په یوه کارخونه کې د چاودنې او ورپسې اورلګېدنې له امله، د اوو ماشومانو په ګډون ۲۱ کسان مړه شوي او شپږ نور ټپيان دي.

د انډين اېکسپرس د راپور له مخې، دغه چاودنه تېره ورځ رامنځته شوې ده.

راپور کې راغلي چې د یادې چاودنې او ورپسې د اورلګېدنې له امله، د اوو ماشومانو په ګډون ۲۱ کسانو ژوند له لاسه ورکړی او شپږ تنه نور ټپيان شوي دي.

ځايي پولیسو رسنیو ته ویلي چې یادې کارخونې په غیرقانوني ډول د ګجرات ایالت، باناسکانته ولسوالۍ اړوند د دیسا ښار په څنډه کې فعالیت درلود.

پولیسو ویلي چې د چاودنې د لامل موندلو هڅې یې پیل کړي، خو ځينو رسنیو ویلي چې دغه پېښه د یوه دیګ‌بخار د چاودنې له امله رامنځته شوې ده.