کابل (پژواک، ۱۳ وری ۱۴۰۴): د ماشومانو لپاره د ملګرو ملتونو د ملاتړ صندوق وایي، په تېرو دوو اونیو کې پر غزه د اسرائیلو د بریدونو له امله لږ تر لږه ۳۲۲ ماشومانو ژوند له لاسه ورکړی او ۶۰۹ نور ټپیان شوي دي.
په غزه کې د اوربند لومړي پړاو له پاي ته رسېدو وروسته، دوه اونۍ مخکې د مارچ پر ۱۸مه اسرائيلو يو ځل بيا پر غزه بريدونه پيل کړل.
بيبيسي د ماشومانو لپاره د ملګرو ملتونو د ملاتړ صندوق (یونیسف) له قوله لیکلي چې په تېرو دوو اونيو کې پر غزه د اسرائیلو د بریدونو له بیا پیلېدو راهیسې په دې تړانګه کې لږ تر لږه ۳۲۲ ماشومانو ژوند له لاسه ورکړی او ۶۰۹ نور د بریدونو په ترڅ کې ټپیان شوي دي.
راپور کې راغلي: «په غزه کې د جګړې له بیا پیل راهیسې، او د مارچ تر ۳۱مې پورې د لسو ورځو په موده کې، بېرحمه او بېتوپیره بمبارۍ هره ورځ د ۱۰۰ ماشومانو د مړینې یا معلولیت لامل شوې دي.»
د یونیسف اجرائیوي ریيسې کترېن رسل ویلي، په غزه کې اوربند د ماشومانو پر مخ د اړتیا وړ مرستې پرانیستې او د پرمختګ لپاره یې هیله پیدا کړې وه خو اوس ماشومان یو ځل بیا د تاوتریخوالي په وژونکې دوره کې ښکېل شوي.
یونیسف ویلي، دغه ماشومانپه غزه کې د جګړې قربانیان وو چې په لنډمهالو خیمو او یا ویجاړو کورونو کې يې ژوند کاوه.
GET IN TOUCH
NEWSLETTER
SUGGEST A STORY
PAJHWOK MOBILE APP